Послѣ́дованіе моле́бнаго пѣ́нія ко Го́споду Бо́гу на́шему за лю́ди, пѣва́емаго во вре́мя бра́ни проти́во супоста́товъ.

Возгласи́вшу іере́ю: Благослове́нъ Бо́гъ на́шъ...

Чте́цъ: Сла́ва Тебѣ́, Бо́же на́шъ, сла́ва Тебѣ́. Царю́ Небе́сный... Трисвято́е, по Отче на́шъ... Го́споди, поми́луй, 12. Сла́ва и ны́нѣ. Пріиди́те поклони́мся.., три́жды.

Посе́мъ пѣ́вчіи пою́тъ по кли́росамъ:

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

(Чте́цъ): Услы́шите до послѣ́днихъ земли́. Яко съ на́ми Бо́гъ.

Могу́щіи покаря́йтеся. Яко съ на́ми Бо́гъ.

Аще бо па́ки возмо́жете, и па́ки побѣжде́ни бу́дете. Яко съ на́ми Бо́гъ.

И и́же а́ще совѣ́тъ совѣщава́ете, разори́тъ Госпо́дь. Яко съ на́ми Бо́гъ.

И сло́во, е́же а́ще возглаго́лете, не пребу́детъ въ ва́съ. Яко съ на́ми Бо́гъ.

Стра́ха же ва́шего не убои́мся, ниже́ смути́мся. Яко съ на́ми Бо́гъ.

Го́спода же Бо́га на́шего Того́ освяти́мъ, и То́й бу́детъ на́мъ въ стра́хъ. Яко съ на́ми Бо́гъ.

И а́ще на Него́ надѣ́яся бу́ду, бу́детъ мнѣ́ во освяще́ніе. Яко съ на́ми Бо́гъ.

И упова́я бу́ду на Него́, и спасу́ся Имъ. Яко съ на́ми Бо́гъ.

Се́ а́зъ и дѣ́ти, я́же ми́ даде́ Бо́гъ. Яко съ на́ми Бо́гъ.

Лю́діе ходя́щіи во тмѣ́, ви́дѣша свѣ́тъ ве́лій. Яко съ на́ми Бо́гъ.

Живу́щіи во странѣ́ и сѣ́ни сме́ртнѣй, свѣ́тъ возсія́етъ на вы́. Яко съ на́ми Бо́гъ.

Яко Отроча́ роди́ся на́мъ. Сы́нъ, и даде́ся на́мъ. Яко съ на́ми Бо́гъ.

Его́же нача́льство бы́сть на ра́мѣ Его́. Яко съ на́ми Бо́гъ.

И ми́ра Его́ нѣ́сть предѣ́ла. Яко съ на́ми Бо́гъ.

И нарица́ется и́мя Его́, Вели́ка Совѣ́та Ангелъ. Яко съ на́ми Бо́гъ.

Чу́денъ, Совѣ́тникъ. Яко съ на́ми Бо́гъ.

Бо́гъ крѣ́покъ, Власти́тель, Нача́льникъ ми́ра. Яко съ на́ми Бо́гъ.

Оте́цъ бу́дущаго вѣ́ка. Яко съ на́ми Бо́гъ.

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

Съ на́ми Бо́гъ, разумѣ́йте, язы́цы, и покаря́йтеся. Яко съ на́ми Бо́гъ.

Діа́конъ же чте́тъ ектенію́ обы́чную: Ми́ромъ Го́споду помо́лимся.

Ли́къ: Го́споди, поми́луй.

О Свышнем мире, и спасении душ наших, Господу помолимся.

О святем храме сем, и с верою, благоговением и страхом Божиим входящих вонь, Господу помолимся.

О великом господине и отце нашем святейшем патриархе Кирилле, и о господине высокопреосвященнейшем митрополите Варсонофии и о господине нашем преосвященнещем епископе Мстиславе, честнем пресвитерстве, во Христе диаконстве, о всем притче и людех, Господу помолимся.

О Богохранимей стране нашей, властех и воинстве ея, Господу помолимся.

О святей обители сей, всяком граде, стране, и верою живущих в них, Господу помолимся.

О благорастворении воздухов, о изобилии плодов земных и временех мирных, Господу помолимся.

О плавающих, путешествующих, недугующих, страждущих, плененных, и о спасении их, Господу помолимя.

О е́же лу́къ мѣ́дянъ - положи́ти мы́шцы вѣ́рныхъ Свои́хъ и укрѣпи́ти десни́цу и́хъ - си́лою крѣ́пости Своея́, въ побѣжде́ніе и попра́ніе супоста́товъ на́шихъ, Го́споду помо́лимся.

Ли́къ: Го́споди, поми́луй.

О е́же неосла́бну, непреобори́му, побѣди́тельну же си́лу, крѣ́пость и му́жество съ хра́бростію Христоимени́тому во́инству на́шему на сокруше́ніе враго́въ и супоста́тъ на́шихъ и всѣ́хъ хитрообра́зныхъ и́хъ навѣ́товъ пода́ти, Го́споду помо́лимся.

Ли́къ: Го́споди, поми́луй.

О е́же студа́ и безче́стія ли́ца проти́вящихся на́мъ испо́лнити, се́рдце же и́хъ - стра́ха и у́жаса; и а́нгелъ Госпо́день да бу́детъ погоня́яй и поража́яй и́хъ, Го́споду помо́лимся.

Ли́къ: Го́споди, поми́луй.

О е́же посрами́ти крестоненави́стное - супоста́тъ на́шихъ - ца́рство и просла́вити си́лою Кре́стною въ побѣ́дѣ лю́ди Своя́, Го́споду помо́лимся.

Ли́къ: Го́споди, поми́луй.

О е́же услы́шати отъ Це́ркве святы́я Своея́ во́пль и воздыха́ніе единовѣ́рныхъ на́шихъ, и отъ враго́въ и супоста́тъ порабоще́нныхъ рабо́въ Свои́хъ, въ печа́ли и ско́рби свое́й къ Нему́ вопію́щихъ, и извести́ отъ тли́ живо́тъ и́хъ, Го́споду помо́лимся.

Ли́къ: Го́споди, поми́луй.

Заступи́, спаси́, поми́луй и сохрани́ на́съ, Боже, Твоею благодатию.

Ли́къ: Го́споди, поми́луй.

Пресвяту́ю, Пречи́стую, Преблагослове́нную, славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Ли́къ: Тебѣ́, Го́споди.

Иере́й возглаша́етъ: Яко подоба́етъ Тебѣ́ вся́кая сла́ва...

Ли́къ: Ами́нь.

Посе́мъ: со стихи́, на гла́съ 1.

Бог Господь и явися нам, благословен Грядый во имя Господне.

Спаси́, Го́споди, лю́ди Твоя́ и благослови́ достоя́ніе Твое́, побѣ́ды православным христианом, на сопроти́вныя да́руя и Твое́ сохраня́я Кресто́мъ Твои́мъ жи́тельство.

Сла́ва, и ны́нѣ.

Предста́тельство Стра́шное и Непосты́дное, не пре́зри, Блага́я, моли́твъ на́шихъ, Всепѣ́тая Богоро́дице, утверди́ правосла́вныхъ жи́тельство. Спаси́ люди Твоя, и пода́ждь нам съ Небесе́ побѣ́ду, зане́ родила́ еси́ Бо́га, еди́на Благослове́нная.

Діа́конъ: Прему́дрость, во́нмемъ.

Чте́цъ: Проки́менъ, гла́съ 4:

Го́споди, си́лою Твое́ю возвесели́тся ца́рь* и о спасе́ніи Твое́мъ возра́дуется зѣло́.

Сти́хъ: Жела́ніе се́рдца его́ да́лъ еси́ ему́ и хотѣ́нія устну́ его́ нѣ́си лиши́лъ его́.

Къ Кори́нѳяномъ послания апостола Павла чтение (зача́ло 172):

Бра́тіе, Бо́гу благодаре́ніе, всегда́ побѣди́тели на́съ творя́щему о Христѣ́ Іису́сѣ и воню́ ра́зума Его́ явля́ющу на́ми во вся́комъ мѣ́стѣ. Яко Христо́во благоуха́ніе есмы́ Бо́гови въ спаса́емыхъ и въ погиба́ющихъ. Овѣмъ у́бо - воня́ сме́ртная въ сме́рть, о́вѣмъ же - воня́ живо́тная въ живо́тъ. И къ си́мъ кто́ дово́ленъ? Царю́ же вѣко́въ, Нетлѣ́нному, Неви́димому, Еди́ному Прему́дрому Бо́гу - че́сть и сла́ва во вѣ́ки вѣко́въ, ами́нь.

Иере́й: Ми́ръ ти́.

Чте́цъ: И ду́хови твоему́. Діа́конъ: Прему́дрость, про́сти, услы́шимъ свята́го Ева́нгелія.

Иере́й: Ми́ръ всѣ́мъ.

Ли́къ: И ду́хови твоему́.

Иере́й: Отъ Матѳе́я свята́го Ева́нгелія чте́ніе.

Ли́къ: Сла́ва Тебѣ́, Го́споди, сла́ва Тебѣ́.

Діа́конъ: Во́нмемъ.

Рече́ Госпо́дь: проси́те, и да́стся ва́мъ; ищи́те, и обря́щете; толцы́те, и отве́рзется ва́мъ. Вся́къ бо прося́й пріе́млетъ, и ища́й обрѣта́етъ, и толку́щему отве́рзется. Или́ кто́ е́сть отъ ва́съ человѣ́къ, его́же, а́ще воспро́ситъ сы́нъ его́ хлѣ́ба, еда́ ка́мень пода́стъ ему́? Или́ а́ще ры́бы про́ситъ, еда́ змію́ пода́стъ ему́? Аще у́бо вы́, лука́ви су́ще, умѣ́ете дая́нія бла́га дая́ти ча́дамъ ва́шимъ, кольми́ па́че Оте́цъ ва́шъ Небе́сный да́стъ бла́га прося́щимъ у Него́.

Ли́къ: Сла́ва Тебѣ́, Го́споди, сла́ва Тебѣ́.

Діа́конъ: Поми́луй на́съ, Бо́же, по вели́цѣй ми́лости Твое́й, мо́лимтися, услы́ши и поми́луй.

Ли́къ: Го́споди, поми́луй, три́жды.

Еще́ мо́лимся о великом господине и отце нашем святейшем патриархе Кирилле, и о господине высокопреосвященнейшем митрополите Варсонофии и о господине нашем преосвященнещем епископе Мстиславе, и всей во Христе братии нашей.

Ли́къ: Го́споди, поми́луй, три́жды.

Еще́ мо́лимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.

Ли́къ: Го́споди, поми́луй, три́жды.

Еще́ моли́мся о все́мъ Христолюби́вомъ во́инствѣ нашем.

Ли́къ: Го́споди, поми́луй, три́жды.

Не на лу́къ на́шъ упова́емъ, ни ору́жіе на́ше спасе́тъ на́съ, Го́споди, но Твоея́ всемогу́щія по́мощи про́симъ, и на Твою́ си́лу дерза́юще, на враги́ на́ша ополча́емся, и Имя Твое́ вѣ́рно призыва́емъ, со умиле́ніемъ мо́лимтися, Всемогíй Го́споди, ми́лостивно услы́ши и поми́луй.

Ли́къ: Го́споди, поми́луй, три́жды.

Защи́тниче правовѣ́рныхъ, посли́ стрѣ́лы Твоя́, Го́споди, и смяте́ніе сотвори́ враго́мъ на́шимъ, блесни́ мо́лнія, и разждени́ я́, посли́ ру́ку Твою́ свы́ше, и покори́ и́хъ, и въ ру́ки вѣ́рному Твоему́ во́инству преда́ждь, мо́лимтися, услы́ши и поми́луй.

Ли́къ: Го́споди, поми́луй, три́жды.

Во вѣ́ки Пребыва́яй, Милосе́рде Го́споди, запрети́ язы́комъ въ достоя́ніе Твое́ приходя́щимъ, и оскверня́ющимъ Це́рковь святу́ю Твою́. Пожени́ и́хъ бу́рею Твое́ю и гнѣ́вомъ Твои́мъ смути́ и́хъ, испо́лни ли́ца и́хъ безче́стія, да постыдя́тся и смяту́тся въ вѣ́къ вѣ́ка, да посра́мятся, и си́лою суде́бъ Твои́хъ го́рдость и́хъ да сокруши́тся, Имя же Твое́ свято́е да просла́вится въ на́съ, прилѣ́жно мо́лимтися, услы́ши и поми́луй.

Ли́къ: Го́споди, поми́луй, три́жды.

Призри, Владыко Человеколюбче, милостивым Твоим оком на рабов Твоих – воинов
Владимира, Сергия, Константина, Игоря, Олега, Олега, Николая, Андрея, Олега, Иоанна, Георгия, Леонида, Сергия, Александра, Александра, Романа, Александра, Сергия, Алексия, Павла, Павла, Вячеслава, Антония, Максима
услышы моления наша, с верою Тебе приносимыя, яко Сам рекл еси: вся, елика молящися просите, - веруйте, яко приимите, и будет вам. Сего ради и мы аще и недостойнии, уповающи на Милость Твою, просим: подаждь благость рабом Твоим сим и исполни благая желания их, мирно же и тихо во здравии и долгоденствии вся дни их соблюди, рцем вси: скоро услыши и милостивно помилуй.

О е́же непреобори́му и побѣди́тельну всегда́ надъ христоненави́стными враги́ бы́ти главе государства Российскаго Владимиру и правовѣ́рному во́инству; и ми́ръ, и сла́ву всели́ти въ земли́ на́шей - прилѣ́жно мо́лимся, Го́споди, услы́ши и поми́луй.

Ли́къ: Го́споди, поми́луй, три́жды.

Иере́й, возгла́съ: Услы́ши ны́, Бо́же, Спаси́телю на́шъ, упова́ніе всѣ́хъ конце́въ земли́ и су́щихъ въ мо́ри дале́че, и ми́лостивъ, ми́лостивъ бу́ди, Влады́ко, о грѣсѣ́хъ на́шихъ, и поми́луй ны́. Ми́лостивъ бо и человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ.

Ли́къ: Ами́нь.

Діа́конъ: Со умиле́ніемъ, прекло́нше колѣ́на, Го́споду помо́лимся.

Ли́къ: Го́споди, поми́луй.

Го́споди Бо́же на́шъ, послу́шавый Моисе́я, просте́рша къ Тебѣ́ ру́цѣ - и лю́ди Изра́илевы укрѣпи́вый на Амали́ка, ополчи́вый Іису́са Нави́на на бра́нь и повелѣ́вый со́лнцу ста́ти, Ты́ и ны́нѣ, Влады́ко Го́споди, услы́ши на́съ, моля́щихся Тебѣ́, укрѣпи́ си́лою Твое́ю главу государства Российскаго Владимира, благослови́ добрые его́ дѣла́, умно́жи сла́ву его́ побѣ́дами надъ противобо́рствующими Правосла́вной Це́ркви, утверди́ Всеси́льною Твое́ю Десни́цею отечество наше, сохрани́ во́инство наше, посли́ а́нгела Твоего́ укрѣпля́юща и́хъ, отыми́ отъ ни́хъ вся́къ гла́дъ и па́губу, и изба́ви я́ отъ огня́, и меча́, и нападе́нія вра́гъ, и отъ вся́каго воста́нія проти́внаго, пода́ждь и́мъ вся́, я́же ко спасе́нію проше́нія, споборствуя и́мъ во все́мъ. Посли́, Го́споди, неви́димо Десни́цу Твою́, рабы́ Твоя́ заступа́ющую во всѣ́хъ, я́ко Твоя́ Держа́ва, Ца́рство и Си́ла, отъ Тебе́ по́мощь вси́ пріе́млемъ, на Тя́ упова́емъ и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ, и при́сно и во вѣ́ки вѣко́въ.

Ли́къ: Ами́нь.

Діа́конъ: Прему́дрость.

Ли́къ: Честнѣ́йшую херуви́мъ...

Сла́ва, и ны́нѣ.

Го́споди, поми́луй, три́жды.

Владыко, благослови́.

Иере́й твори́тъ обы́чный дневны́й отпу́стъ:

Христос Истинный Бог наш, молитвами Пречистыя Своея Матере, Силою Честнаго и Животворящего Креста, Архангела Михаила и всех Безплотных сил Небесных, святаго мученика Георгия Победоносца, святых благоверных князей Александра Невского и Димитрия Донскаго, преподобного Киприана Стороженского и всех святых, помилует и спасет нас, яко Благ и Человеколюбец.